pali sin

mi pana e lipu tawa ni lon tenpo pini la mi jo ala e mani li pali ala. mi kama sona ala lon tomo sona suli. tomo mi li tomo pi mama mi. tenpo ni la mi pali mani lon suno ale. kulupu esun li pana e mani mute e misikeke kin. tomo mi li tan mani mi taso. ni li tan seme?

mi sona e ilo Forge pi musi Manka.

tenpo pini la mama mi li toki tawa mi, “mi alasa e pali tawa sina. sina ken pali e poki ante pi musi Manka.” ken suli la sona sina la ni li nasa mute tawa mi. jan ala li lanpan e mani tan pali pi poki ante. isipin ken mi la pali la jan li pali e ijo tawa esun ike pi musi Manka Bedrock. ni li lon ala.

sona kama mi la pali ni li tawa kulupu suli pi ilo Jutu. ona li pali e sitelen tawa kepeken musi Manka. ona li kepeken e poki ante mute mute. ijo mute li lon li tawa namako li pali namako li ijo ante. poki ante mute li lon ilo Forge majuna. jan li wile sin e poki ante la ona li kepeken e pali mute mute. ni la ona li awen kepeken ilo Forge majuna.

mi pana e lipu pali tawa ona. tenpo nanpa wan la ona li toki lili tawa mi. tenpo poka la ona li toki mute tawa mi. wile ona la mi pali e poki ante tawa ona. mi pali e ona. (mi ken toki e ni la pali mi li pona mute, lon pilin mi). mi pana e ona tawa ona la ona li toki e ni: mi ken pali lon kulupu ona!

jan ante li wile pali. jan ante li jo e lipu pi tomo sona suli. taso mi jo e ijo pi ona ala. mi sona e ilo Forge majuna.

tenpo ni la mi pali lon tenpo mun tu. ken la sina wile sona e pilin mi tawa pali ni. mi sona ala toki e ni. kulupu esun ni li namako mute. pilin mi la jan lon ni li pona. taso tenpo ni la pali li namako ala. mi kama pali lon kulupu ni la ona li toki e ni tawa mi: mi kama pali e ijo suli tawa ona. taso… tenpo ni la ona li pana ala e ijo suli tawa mi! ni la mi… pali mute ala. tenpo suno ale la mi tawa tomo esun li pali lili. ken la pilin sina la ni li pona. mani pi pali ala li pona. taso ni li monsuta tawa mi. mi sona ala e kama. mi pali tawa kulupu ona la… ona o pana e pali tawa mi!!